Det opne møtet i Sykkylven Rotary Klubb sist onsdag samla fram mot førti medlemmer og gjester. Alle ville dei høyre det som konstituert administrerande direktør i Helse Møre og Romsdal, Dag Hårstad, hadde å seie om sjukehusstruktur og
utvikling av spesialisthelsetenestene i fylket vårtPresident Hallstein
Lillevik opna møtet med å ønskje gjester og medlemmer velkomne, før han let
Olav leie allsongen Dei gamle fjell i
syningom, av Ivar Aasen. Her ligg som kjent varige verdiar som kan
underskrivast den dag i dag både om å bygge ei god folkehelse og om dei mange
endringar vi kan sjå i samfunnet rundt oss. Alle møta
i Rotary startar med 3-minutt, der medlemmet lyt «fatte seg i kortheit» om eit tema
han eller ho vel sjølv, men gjerne relatert til yrket sitt. NAV-tilsett ved
Arbeidslivs-senteret i Ålesund, Odd Jostein Drotninghaug, held saman med eit
dusin andre eit vake auge på arbeidsmarknads-situasjonen. Han har særleg
merksemd mot deler av Sunnmøre. Odd tok utgangspunkt i ein fersk rapport som
regjeringa har fått utarbeidd om Evaluering
av IA-avtalen, inkluderande arbeidsliv. Rapporten viser m.a. at det har
gått veldig bra med å redusere sjukefråveret – spesielt i privat sektor, som
har under 3,9 % fråver. Også i offentleg sektor går det rette vegen mot målet
5,6 %.
Helse
Møre og Romsdal Hf
Dag Hårstad er trønderen som vart konstituert i
jobben etter Astrid Eidsvik, då ho i desember 2014 gjekk av på dagen som øvste
administrative leiar i Hf, helseføretaket. Han er kjend som ein dyktig leiar,
men er av utdanning flygeleiar! Dessutan er han styremedlem i Avinor og pilot. For få år sidan
var han adm. dir. i Rusbehandling Midt-Norge, der Greta Herje var styreleiar.
Når «gamlesjefen» spurde han om å vitje rotaryklubben i Sykkylven, kunne han
ikkje godt seie nei. «Litt meir på leiings-biten enn på struktur-biten» ville
han styre mot i føredraget sitt, men han ville også innom Nasjonal helse- og
sykehusplan, og «ein del andre ting» - strategi, kultur og leiarskap, på 40-50
minutt. Inga lita formidlingsoppgåve, verken for føredragshaldaren eller for
skrivaren med avgrensa spalteplass til rådvelde! Kva er Helse M og R si
oppgåve? Vi skal yte meir og betre helsetenester i tråd med befolkninga på
270.000 sine behov, til ein lågare kostnad. Sjukehusa i Ålesund, Volda, Molde
og Kristiansund skal syte for det, og vil vere verktøyet for å løyse denne
oppgåva. Kortversjonen er 6700 tilsette, og ei årleg omsetning på 5,9
milliardar kroner – ein halv milliard kroner i månaden. Ei svær bedrift, som
har kontakt med om lag 300.000 pasientar i året! I tillegg kjem eit ti-tals
institusjonar som dekker særlege behov. Effekten av «lyn-nedslaget» for eit
halvår sidan har gjort at situasjonen i fylket og helseføretaket er svært
alvorleg. Vurderingar og oppfatningar i dei tre fogderia Nordmøre, Romsdal og
Sunnmøre er høgst ulike, og ber ikkje preg av ein heilskaps helsepolitikk for
fylket. Til dømes er det skepsis ved sjukehuset i Ålesund til eit nytt
«cluster-sjukehus» til 4-5 mrd. kroner i Molde, som etter fleire si meining vil
rokke ved investeringar og status til sentralsjukehuset her. I Volda-området er
dei bekymra for å bli salderingspost for alt saman. Dette fører til uvisse,
mangel på tillit, ubehag og rom for konspirasjons-aktivitetar. Dette er ikkje
bra for Helse Møre og Romsdal Hf, og fører til ein vanvittig energi-lekkasje på
alle nivå. Sjølv etablerte, politiske
strukturar slær sprekker!
For å føre det store helseføretaket på stø kurs mot smulare farvatn, meinte
Hårstad at eit viktig element i dei strategiske linene for å skape ny tillit
vil vere å delegere flest mogleg avgjerder lengst mogleg nedover i systemet.
Kontinuerleg opplæring og kompetanseheving er også eit viktig element til beste
for både føretaket og pasienten, som først og fremst og til sjuande og sist er den
som det heile er bygd opp for å tene! Potensialet er kjempestort, men det tek
tid. Vi lever i eit konservativt miljø, som har ein tendens til å seie: «Vi
veit kva vi har, men vi veit ikkje kva vi får.» Tillit og kompetanse på alle
nivå, også blant politikarane, vil vere den beste medisin for å skape også eit godt og sunt helseføretak!
