Nyhetsdetaljer

Medlemsmøte med Kjetil Kvammen

Sykkylven Rotary Klubb; møte 25. mars 2026, i lokalet til Sykkylven Frivilligsentral.
referat v/ Olav Pileberg.

1. «Vikarpresident» Ilyas Degirmenci ønska velkommen til klubbmedlemmene og til gjestene advokat Kjetil Kvammen og Johanna Degirmenci (14, dotter av Ilyas). Ilyas var bedd om å leie møtet, etter som både Kristin, past president og innkommande president ikkje kunne møte. Så viste det seg at verken Knut Jarle som skulle ha 3-minutt, eller hans reserve kunne møte, og dermed gav «altmuligmannen» Ilyas seg sjølv den oppgåva,- på strak arm.

2. Kunngjeringar v/ Ilyas: frammøte forrige møte 22, dvs. 65 prosent. Fødselsdagar: Ingrid 55, Hallgeir 63, Bastian 67. Hipp hurra og applaus! Møtefri i påskeveka. Deretter, 8. april, ope møte på Sykkylven kulturhus med tidlegare Geelmuyden Kiese-sjef men noverande kommunikasjons-rådgjevar Severin Roald som gjest. Han har nettopp etablert seg i eigen regi, med kontor i Ålesund. Tema: Tillitsbasert ledelse. Ilyas/ SRK oppmodar alle om å mobilisere nettverket sitt, slik at kulturhuset vert velfyllt onsdag den 8. april klokka 19. Bruk gjerne sosiale flater!

3. Allsong: Olav presenterte Draumen om fred, i Ivar Medaas sin versjon på nynorsk, s.10 i heftet.

4. 3-minutt v/ Ilyas. Han vart i dag kontakta av avisa Nyss. Dei lurte på kva som var på gang i det tidlegare legekontoret/ Helsesenteret i Haugbukta. Dei hadde fått nyss om at Ilyas hadde teke over lokala der. Ilyas stadfesta overtaking frå februar 2026, og per i dag har ikkje den nye eigaren bestemt kva han skal bruke det til. Ilyas var særs interessert i innspel frå publikum, og han ville prioritere føremål der «folk flest» og gjerne barn/ unge fekk nytte av lokala med lett tilkomst og sentral plassering. Det er ikkje avgjort kva som skjer vidare. Norconsult er engasjert som utviklar, og Åsne Folstad i Skaparglede, på det lokale plan. «Det er viktig for meg å investere for å utvikle Sykkylven!» avslutta Ilyas, før han opna for neste økt:…

5. Kaffi/ te og ein matbit.

6. Kåseri: advokat Kjetil Kvammen; med over 40 år som jurist på samvitet: han opna med å takke for invitasjonen og for vår interesse for «det som ej he stelt med…» Oppgåva frå klubben var grei: fritt val til å snakke om det han ønska. Dermed ville han dele med oss a) Personlege ting, b) Arbeidskvardagen, c) Utviklinga, d) Advokat-rolla generelt. Kjetil er frå Stordal, med mor frå Sykkylven, med slektsgard på Brunstad. Utdanning ved Det juridiske fakultet, universitetet i Oslo. Tilleggsutdanning ved BI,- Bedriftsøkonomisk Institutt: rekneskap og skatterett. Tilleggsutdanning gjennom Justisdepartementet til advokat. Pluss eit utal av kurs. b) Første praksis rett frå eksamensbordet til Finansdepartementet, innan felt som avgift og kontakt med dei nitten skattefogdane i Noreg. Første saka Kjetil fekk prosedere var i Arendal, Agder lagmannsrett, for nettopp dette departementet. Etter Oslo, gjekk ferda til Sykkylven: her var lyst ledig nyoppretta stilling som næringskonsulent. Som sekretær for Industrilaget kom Kvammen i god kontakt gjennom fjorten år med dei mange industri-bedriftene i kommunen. Han søkte, og fekk, permisjon for ei stilling som dommarfullmektig på Lillehammer: stor overgang til dømmande funksjon, under sorenskrivar Arne Haugestad. Deretter retur til Sykkylven, med ei advokat-bevilling i lomma, utferda av Fylkesmannen i Oppland. Frå 1. juni 1983 advokat her i kommunen, ein dag pr. veke. Dåverande rådmann Herman Haugen kommenterte: «Snart er nok du advokat på full tid!» Han fekk rett: frå 1. februar 1986 advokat på full tid. Dermed 40 år til 1. februar 2026. Arbeidsområdet utvida frå Sykkylven til distriktet omkring, med eit breitt saks-område, etter som marknaden spurde etter tenester. Han har prosedert hovudsakleg sivile saker både i tingretten, lagmannsretten og jordskifteretten. Jamvel for Høgsterett har Kvammen prosedert ei sak,- som han vann. Ei spesiell oppleving! Selskap og styreverv var arbeidsområde som også kravde sin innsats. I 1986 vart det samarbeid med Oddbjørn Langlo, Stranda, og stifta Storfjordsambandet, med det som føremål å etablere fast samband over fjorden til Ålesund. Her var Kvammen dagleg leiar fram til 2016. Pr. dags dato er ikkje prosjektet kome særleg vidare. Kontrollkomitéen for Sparebanken Møre var han leiar for i samfulle 21 år. Sunnmøre kontroll-sekretariat var Kvammen advokat for frå 2009. Dette var kommunestyra sitt verktøy for kontroll av forvaltninga. 2011 eit liknande oppdrag for ni kommunar på søre Sunnmøre. c) UTVIKLINGA: nesten alt forandrar seg, men noko går tregare: sjølve grunnprinsippa og prinsippa for rettsanvendelse «av varig karakter». Ein del av lærdomen frå universitetet er difor «god latin» den dag i dag. Men miljøet rundt advokatane er i stadig endring. «God forvaltnings-skikk» for 20 år sidan, er ikkje forsvarleg forvaltnings-skikk i dag. Helse/ Miljø/ Sikkerhet, HMS, endrar seg og vert strengare. Personvern sameleis. Digital informasjon likeeins. Miljø og klima… (Tenk berre på Greta Thunberg!) Retten sine lover og reglar får stadig større gjennomslag i styringa av samfunnet. Dataverktøy/ ymse program, internett og no dei siste månadene kunstig intelligens, har fått overlag stor betydning for advokaten sin arbeidskvardag. Kvammen var tidleg ute med å «henge seg på» utviklinga her, heilt frå førre årtusen. Med abonnement på ymse «Rettskilder», er behovet for metervis med «tjukke bøker» i stor grad eliminert. Søkemotorane gjer på ein brøkdel av tida arbeidet som advokaten brukte timesvis på med bøkene sine og «Norsk Rettskilde». I dag er det online til alle rettskilder, og Advokatforeningen vil snart rå til/ pålegge medlemmene sine å ta inn KI i saksbehandlinga, for å spare klientane sine for unødvendige utlegg. Det er også verd å merke seg at dagens klientar er langt betre informerte og opplyste enn tidlegare. Dei veit å stille kritiske spørsmål som er relevante for saka si, og advokatane set som regel pris på slike innspel. Dei bør ha i ryggmargen ein sans for kvar ein er i det juridiske landskapet, og kunne kommunisere dette ut, skriftleg og munnleg. Han/ ho må heile tida tenke kreativt og presist til beste for klienten. Dette, saman med teieplikta, vert rekna som grunnmuren i advokat-praksisen og skaper tillit mellom lekmannen og fagmannen. Godt skjøn og å vere løysingsorientert, er like viktig som god kunnskap!
Så mykje, og ein god del meir, delte advokat Kjetil Kvammen med oss som var til stades på møtet. Etter at Ilyas hadde takka, og overlevert pizza gåvebrev til Kjetil, kunne vi alle gå frå møtet, ein god del klokare enn då vi kom!