Matøkt/ kaffipause.

Foredrag: Olav Fjællingsdal, Sykkylven Bil AS. 

Først litt om seg sjølv: ein av fire søsken, fødd og oppvaksen på Øvre Tynes. Far frå Kristiansund og mor frå Smøla. Vil slett ikkje kalle seg sjølv for eit «skulelys». Har gått gradene i «Livets skule» og har vore innom mykje og mangt: Solberg, Gjerde, Peterson, Ekornes, Velledalen Møbler, trålar og linebåt, stålbygg-montering, tunneldriving, anleggsarbeid, Nybø Maskin (Jan Ola Nybø). På 1980-talet: så smått litt eigen «garasjeverksemd»; sal av dekk, småreparasjonar og service-arbeid. Så kom val-dagen: anten finne seg nytt arbeid etter konkurs hos Nybø, eller satse 100 prosent på eigen innsats i eigen etablering. Ein tur i banken resulterte i lån, stort kr. 50.000 og direkte derifrå til nyetablering i den gamle aldersheimen på Vik. Mange år der med bilkjøp, vidaresal og ymse tilhøyrande tenester. Frå 1990 og faktisk heilt til 2005! Dette året kjøpte Olav Esso-stasjonen, som då hadde stått brakk i eit og eit halvt år. Esso ville i utgangspunktet ikkje selje, men Olav kunne få drive, noko som ikkje var aktuelt. Til sist kom det til semje i 2005. I kontrakta sto det om plikt til å drive stasjonen i fem år. Sykkylven Rekvisita vart starta i 1989, og dette var framleis namnet på det personlege føretaket som blei utvida til AS i samband med kjøpet av Essostasjonen. I dag er det framleis registrert i Brønnøysund-registeret som eit AS og drive i butikkdelen i Cirkle K  stasjonen. Sykkylven Bil AS vart starta i 2007, etter tilbygg og oppgradering av eksisterande bygningsmasse. Med i den pakken er autorisert bilverkstad og kjøp/ sal av brukte bensin- og diesel-bilar. Eit eigedomsselskap AS er eigar av bygningsmassen. Dermed er Olav Fjællingsdal åleine (saman med litt «banken») eigar av tre Aksje-Selskap. To år før kontrakta med Esso gjekk ut, i 2008, kom det besøk frå Statoil, som gjerne ville etablere samarbeid. Deira gamle Statoilstasjon 750 meter lenger ute i vegen var for liten. Bilvaskemaskin og varelager vart kjøpt frå Gunnar Vaaler, og etter ein ryddig prosess var Statoil-stasjonen på Vik eit faktum. Etter nokre år tok nyetablerte (2016) Cirkle K over alle Statoilstasjonar, og slik er stoda i dag. Med deltidstilsette er det 25-30 som arbeider i bedrifta/ bedriftene. Olav sjølv har etter kvar fått rikeleg nok arbeid som «papirflyttar» i selskapa sine. – Dessverre, seier han sjølv.

Det var ei særs lydhøyr forsamling av klubbmedlemmer som følgde med i kva denne, i høgste grad «self-made-mannen» hadde fått til. Spørsmåla hagla tett etter foredraget, men Olav vart ikkje svar skuldig. Han skal ha stor takk for grei informasjon og orientering, både om livsløpet sitt og etableringane sine til denne dag. Han fekk solid applaus og takk frå president Knut Jarle Vik – som også ønska alle vel heim til slutt. 

Publisert av Olav Pileberg 6. november 2020