Frammøtet til dugnaden var det ingen ting å seie på i mai-kvelden. Her er heile gjengen under matpausen i «korona-formasjon» frå venstre: Arild, Knut Martin, Jarle, Bastian, Ove, Per, Greta, Helge, Knut Jarle, Petter, Olaf, Jan, Olav, Hallgeir. Øyvind Østvik var gått då biletet vart teke. 

Den vakre Kyrkjeparken vart endå vakrare sist onsdag, då femten rotarianarar pluss traktor var i aksjon med å rydde og rake området. Temperaturen på åtte grader pluss var det ingen ting å seie på. Sola skein og arbeidstilhøva var dei aller beste, noko som også viste att då jobben var gjort rundt klokka 20. Sykkylven Rotary Klubb har hatt denne dugnadsinnsatsen på årsprogrammet sitt omtrent frå den tid parken var ny, og ser på det som eit viktig bidrag til trivsel og velvære i området ved kyrkja. Vi veit at ikkje minst den vakre og godt utstyrte leikeplassen vert mykje nytta – så og seie året rundt.

Dugnad

Også i år har ordet dugnad fått ei vidare tyding: heile folket skal vere dugnad-engasjert for å nedkjempe korona-pandemien som legg fæle føringar for folk i alle land jorda rundt. Folka på Rotary-dugnaden må innrette seg deretter. Alle dei femten deltakarane heldt god avstand, og alle hadde med eigen drikke og kopp til matpausen, medan president Knut Jarle Vik heldt med garantert korona-frie sveler å bite i,- prikkfritt produsert av vår gode medarbeidar Kjellaug Roald. På spørsmål frå denne skrivaren svara alle at det gjekk fint og smakte godt: ingen sure miner var å sjå.  

Vi spurde Olaf Ellingsen (over) om han hadde sakna samlingane, etter som vi berre hadde hatt eitt møte – lagt til Sykkylven kulturhus, sidan julemøtet. – Ja, faktisk så har eg sakna møta! Dei er eit godt, sosialt fellesskap der ein både får lære og høyre nytt i samtale med klubbmedlemmer og gjest (-er).  Dugnaden her i Kyrkjeparken er også god mosjon for kroppen; innsatsen gjer sitt til å smørje heile maskineriet. Heilt i Rotary si ånd: Service Above Self!  

President i SRK, Knut Jarle Vik, stilte med traktor, og let seg gjerne fotografere «høgt på strå», bokstavleg talt. Ove Straumsheim er pålitande bakkemannskap.

Publisert av Olav Pileberg 29. april 2021