Kyrkeparken i Sykkylven, ei perle i sentrum!

Service above self – Å gagne andre – kjem av og til ekstra godt til syne hos medlemane i Sykkylven Rotaryklubb. Tildømes på den årvisse dugnaden i Kyrkjeparken. Etter om lag 365 dager med opphopning av kvister, rask og rusk, gjer det uendeleg godt å få raka og rydda den vakre parken som skal stå fram for både konfirmantar og andre som rører seg i området utetter våren og sommeren. Tysdag denne veka skjedde det igjen; tjue høgt hagekvalifiserte rotarianar tok tak i river og andre reiskapar som kalla fram tilfredse sukk langt ned i grasrøtene og nesten opp i tretoppane.  Åhh, dette gjorde godt kviskra dei. Kai – Otto Roald stilte med sin vakre traktor frå garden, og Arvid Nordstrand levde opp til sitt gode namn og rykte som dugande arbeidsleiar. Når vi legg til at sjølvaste Rotarypresident Hallstein Lillevik baud på kaffi og kjeks, lyt alle forstå at dette var ein særs vellykka kveld med heile 9 varmegrader og sol frå tilnærma skyfri himmel.

Konfirmantane på banen

Også andre var  på banen denne tysdagskvelden. Inne i kyrkja var det prøving av konfirmantkapper og diverse tilhøyrande aktiviteter i høve konfirmasjonen som står føre. Stikkprøver blant dei unge som kom etterpå, kunne tyde på at dette gledde dei seg til. Alt hadde gått på skinner inne. Også på dette området er kompetansen i kyrkjelyden stor, må vite. Lukke til konfirmantar! Lukke til unge og eldre som bruker Kyrkjeparken! 

Referent: Olav Pileberg