Rotary-medlemmene stilte til avtalt tid kl 19, og vi vart tekne imot av Arvid Nordstrand og adm. dir. Magne Klokk, begge med lang fartstid i bedrifta. 

Arvid baud på kaffi og Magne førte ordet i ei fyldig orientering om Nyborg AS, som vart etablert av Alfred Nyborg i 1947, under namnet Alfred Nyborg Maskinfabrikk AS. Alfred hadde m.a. bakgrunn som konstruksjonssjef hos Liaaen i Ålesund. Etter enkle kår i oppstarten, flytte bedrifta til noverande lokasjon på 1960-talet. Produkta var til å begynne med innretta mot fabrikkane i nærområdet, men etter kvart auka horisonten til vifte-produksjon i skips-marknaden. Etter som Noreg på denne tida hadde fleire produktive skipsverft, fekk Nyborg leveringar til desse. Dette varte til 1973, då oljekrisa kom. På byrjinga av -70-talet hadde fabrikken ein topp med rundt 35 tilsette. Mot slutten av 1980-talet hadde marknaden svikta, og berre rundt 12 tilsette var att, med ei omsetting på ca 5 millionar kroner.  Dermed vart det gjort ein restart, med god hjelp frå bankane, som synte velvilje i situasjonen. (Oddbjørn Ramstad var banksjef i Sunnmørsbanken då!) Den første store hallen – ca 1200 m2 – vart  bygd i 1996. På denne tida fekk bedrifta betre plass både til administrasjon, produksjon og lager. No gjekk fabrikken inn i ein ekspansiv periode, med investeringar i bygningar og maskiner. Siste utvidinga, med kantine, kom i 2014. Samla areal er på ca 2500 m2. 

For å kunne møte ein større marknad internasjonalt, gjekk Nyborg AS til kjøp av ei bedrift, ein viftefabrikk, i Polen i 2002. Her fekk dei hand om 40 %  til å begynne med, men med opsjon på 20 % til, noko som vart innløyst i 2004. Nyborg Mawent S.A. heiter denne fabrikken, og han ligg 50 km sør for Gdansk. Her er det om lag 150 tilsette. I tillegg eig ein sidan 2010 ei engineering-bedrift i Gdynia:  NM Design Office, med 7-8 tilsette. 

Flatabø Eigedom AS, er namnet på selskapet som eig bygningane på Nyborg. Namnet er etter plassen der bygningane ligg no. 

Produkta er no som før luftvifter og tilbehør til skipsmarknaden og til dels oljerelaterte installasjonar til havs. Nyborg AS har opparbeidd seg betydeleg kompetanse i denne marknads-nisjen. Dei skreddarsyr produkta etter kunden sine behov. Ved sjølvsyn fekk vi på rundtur i fabrikken sjå produkt på ulike stadier i produksjonen. Storleiken varierte mykje frå dei små, nette produkta, til dei store og tunge konstruksjonane til bruk på oljeplattform. Alt i alt ei interessant omvising  og orientering i nok ei bedrift som Sykkylven har grunn til å vere stolt av! 

Takk frå president Hallstein og medlemmene til Magne og Arvid som delte av si innsikt og sin kunnskap med oss!

Skrivar: Olav p