Nyhetsdetaljer

Medlemsmøte med Caroline Harstad

Sykkylven Rotary Klubb; møte 21. januar 2026, i lokalet til Sykkylven Frivilligsentral.
referat v/ Olav Pileberg.

1) President Kristin Grebstad ønska velkommen til klubbmedlemmene, og minte om at prinsesse Ingrid Alexandra fyllte 22 år. Gjest: Caroline Harstad, hagearkitekt.

2) Allsong: «På folkemunne», side 4 i SRK Songhefte. Olav P. med gitaren. NB: I året 2026 vil vi prøve å synge oss gjennom nemnde Songhefte, utarbeidd i byrjinga av 2000-talet. Komité: Kårstein Blindheim, Odd Holen, Steinar Nordmo, Ove Straumsheim. Av og til med «live» tonefølgje på gitar eller piano, av og til med føresongar på storskjerm/ YouTube.

3) Statistikk v/ Steinar Klokk: a) frammøte og b) bursdagar for Arvid Nordstrand, Olav P og Steinar Nordmo.

4) 3-minutt ved Sindre Stuen. (Vikar for Odd Holen, permisjon) Tema: Endringar. Motstand mot forbetringar i maritime miljø; ein konservativ bransje. Redningsvest? Heilt unødvendig. Vi har greidd oss i alle år utan. Likevel: uteljande liv er berga, nettopp av redningsvesten. Kartmaskin/ GPS sameleis. I dag har nesten alle slikt utstyr om bord. ISM-koden (International Safety Management) eit sikkerhetsstyrings-system som skal dokumentere og forbetre sikkerhets/ tryggingsarbeidet. Oppfordring: tenk på forandringar som framsteg… både på land og hav!

5) Kaffi/ te og ein matbit. Rolf og Jan servitørar.

6) Kåseri: Hagearkitekt Caroline Harstad, presentert av President Kristin, som hadde ho som elev i 5. kl. ved Ullavik skule – i den tida Ivar Vestre var rektor. Olav P supplerte med å fortelje at kreative Caroline som 6.klassing vann tevlinga om å teikne finaste diplomet til Æreselev Elisabeth Andreassen som gjesta skulen saman med Rolf Løvland ved skulen sitt 20 års jubileum i 1994. (EA hadde foreldre frå Hjellane i Ullavik skulekrins) Caroline takka for invitasjonen, og stadfeste at hennar første utdanning var som møbel-designer, frå kunstskulen i Bergen. Sidan blei det interiør-arkitekt utdanning. Etter som ho var godt over gjennomsnittleg interessert i friluftsliv, vart det etter kvart utdanning som gartnar og hagearkitekt, og – i 2007, Lindesnes – Nordkapp, 330 norske mil, saman med Ragnfrid Aamodt og labradoren Snorre. Til fots i eit halvt år, frå 26. februar. Imponerande! Etter kjærleik og karriere i Oslo, retur til heimbygda i 2025. Er no etablert med eige tiltak/ firma «Caroline Harstad» www.cline.no og med tilhald i Næringsfabrikken. Vi frammøtte fekk så bli med på ei bilde- og video reise gjennom «før-under-etter» hage-prosjekt, frå Oslo og Sykkylven. Frå trøsteslause buskas eller «øydemarker» til vakre og prydelege uteområde til glede både for fuglar, insekt, barn og vaksne. Næraste oss: prosjekt i Ullavika, nær Småbåthamna. Sjå «etter»-bilde, i samsvar med oppdragsgjevarane sine ønske. Merk bølgebenken, der du kan slå deg ned, slappe av og finne roa. Svarte plastdukar eller Parkslirekne var ikkje på favorittlista til hagearkitekt Caroline. For framtida håper ho å få faste samarbeids-avtaler med entreprenørar/ oppdragsgjevarar av ymse slag, slik at så vel ute- som inne-miljø blir ein del av dei totale prosjekta. Heilårsdrift/ hage vedlikehald/ skjering av bærbusker og frukttre… Caroline er open for det meste med sin kompetanse. «Tusen takk for meg!»

7) President Kristin takka så mykje for den interessante orienteringa frå sin gamle elev, og overrekte lokalprodusert Hjarteburger til ho, med hjarteleg takk frå oss alle. Vel heim!